ವಿಳಂಬ ದ್ರೋಹ : ಜಲ ಮಂಡಲಿಯ ಮುಖ್ಯ ಅಭಿಯಂತ ಅಮಾನತ್ತು

                                                   
ಬೆಂಗಳೂರು, ಮೇ 24 : ವಿಳಂಬ ದ್ರೋಹ ಎಸಗಿದ ಆರೋಪದ ಮೇರೆಗೆ ಬೆಂಗಳೂರು ಜಲ ಮಂಡಲಿಯ ಯೋಜನೆಗಳ ವಿಭಾಗದ ಮುಖ್ಯ ಅಭಿಯಂತರ ರುದ್ರಮೂರ್ತಿ ಅವರನ್ನು ಅಮಾನತ್ತು ಮಾಡಲು ಆದೇಶಿಸುವುದರೊಂದಿಗೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರ ನಗರ ಪ್ರದಕ್ಷಿಣೆ ಅಧಿಕಾರಿಗಳಿಗೆ ಚುರುಕು ಮುಟ್ಟಿಸಿತು.
ನಗರದ ಹೆಚ್ ಎಸ್ ಆರ್ ಬಡಾವಣೆಯಲ್ಲಿ 18 ಕೋಟಿ ರೂ ವೆಚ್ಚದ ಸರ್ವೀಸ್ ರಸ್ತೆ ಕಾಮಗಾರಿಗಳಿಗೆ ಚಾಲನೆ ನೀಡಿ ನಾಲ್ಕು ವರ್ಷಗಳೇ ಕಳೆದರೂ, ಕಾಮಗಾರಿಗಳು ಇನ್ನೂ ಪೂರ್ಣಗೊಳ್ಳದಿರುವ ಬಗ್ಗೆ ಬಂದ ದೂರಿನ ಹಿನ್ನೆಲೆಯಲ್ಲಿ ಪರಿಶೀಲನೆ ನಡೆಸಿದ ಮುಖ್ಯಮಂತ್ರಿಯವರು ಕರ್ತವ್ಯದಲ್ಲಿ ನಿರ್ಲಕ್ಷ್ಯ ಹಾಗೂ ಬೇಜವಾಬ್ದಾರಿತನ ತೋರಿದ ಅಧಿಕಾರಿಯನ್ನು ಅಮಾನತ್ತುಗೊಳಿಸಲು ಸ್ಥಳದಲ್ಲಿಯೇ ಆದೇಶಿಸಿದರು.
ಮಳೆಗಾಲ ಪ್ರಾರಂಭವಾಗುವ ಮುನ್ನವೇ ನಗರದ ನಾಗರೀಕರು ಮಳೆಯಿಂದ ಅನುಭವಿಸುವ ತೊಂದರೆಯನ್ನು ನಿವಾರಿಸುವ ಸಲುವಾಗಿ ಬೆಂಗಳೂರು ನಗರ ಪ್ರದಕ್ಷಿಣೆಗೆ ತಮ್ಮ ಗೃಹ ಕಚೇರಿ ಕೃಷ್ಣಾದಿಂದ ಮಂಗಳವಾರ ಬೆಳಿಗ್ಗೆ ಹೊರಟ ಸಿದ್ದರಾಮಯ್ಯ ಅವರು ಮೊದಲು ಕಿನೋ ಚಿತ್ರಮಂದಿರದ ಬಳಿಯ ಕೆಳ ಸೇತುವೆ ಪ್ರದೇಶಕ್ಕೆ ಭೇಟಿ ನೀಡಿ ಪರಿಶೀಲಿಸಿದರು. ಪ್ರತಿ ಬಾರಿ ಭಾರೀ ಮಳೆಗೆ ನೀರು ತುಂಬಿ ಬಸ್ ಕೂಡಾ ಮುಳುಗುವ ಈ ಪ್ರದೇಶದಲ್ಲಿ ಒಂದೂವರೆ ಕೋಟಿ ರೂ ವೆಚ್ಚದಲ್ಲಿ ಚರಂಡಿ ನಿರ್ಮಿಸಿ ನೀರು ನಿಲ್ಲದಂತೆ ಕ್ರಮ ಕೈಗೊಳ್ಳಲು ಅಧಿಕಾರಿಗಳಿಗೆ ಸೂಚಿಸಿದರು.
ಡಾಂಬರು ರಸ್ತೆ ಬದಲು ಕಾಂಕ್ರೀಟ್ ರಸ್ತೆ
ನಂತರ, ನಗರದ ವಿಠ್ಠಲ್ ಮಲ್ಯ ರಸ್ತೆಗೆ ತೆರಳಿ ವರುಣನ ಅಬ್ಬರಕ್ಕೆ ತತ್ತರಿಸುವ ಶ್ರೀ ಕಂಠೀರವ ಹೊರಾಂಗಣ ಕ್ರೀಡಾಂಗಣಕ್ಕೆ ಭೇಟಿ ಇತ್ತ ಮುಖ್ಯಮಂತ್ರಿ ಅಲ್ಲಿನ ಹೊಸ ಚರಂಡಿ ಕಾಮಗಾರಿಗಳನ್ನು ವೀಕ್ಷಿಸಿದರು. ಅಲ್ಲಿಂದ ರೆಸಿಡೆನ್ಸಿ ರಸ್ತೆಯ ಟೆಂಡರ್ ಶ್ಯೂರ್ ರಸ್ತೆ ಕಾಮಗಾರಿಗಳನ್ನು ಪರಿಶೀಲಿಸಿದ ಸಿದ್ದರಾಮಯ್ಯ ಅವರು ಇನ್ನು ಮುಂದೆ ಡಾಂಬರು ರಸ್ತೆಗಳಿಗೆ ಬದಲಾಗಿ ಕಾಂಕ್ರೀಟ್ ರಸ್ತೆಗಳನ್ನು ನಿರ್ಮಿಸಲು ಯೋಜನೆ ರೂಪಿಸಿ. ಸ್ವಲ್ಪ ಹಣ ಹೆಚ್ಚು ವೆಚ್ಚವಾದರೂ ರಸ್ತೆಗಳು ದೀರ್ಘಕಾಲ ಬಾಳಿಕೆಗೆ ಬರುತ್ತವೆ. ಹಂತ ಹಂತವಾಗಿ ಸಂಪನ್ಮೂಲಗಳನ್ನು ಕ್ರೋಢೀಕರಿಸಿಕೊಂಡು ಈ ನಿಟ್ಟಿನಲ್ಲಿ ಮುನ್ನಡೆಯುವುದು ಸೂಕ್ತ ಎಂದು ಸ್ಥಳದಲ್ಲಿಯೇ ಹಾಜರಿದ್ದ ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆಯ ಆಯುಕ್ತ ಎನ್. ಮಂಜುನಾಥ ಪ್ರಸಾದ್ ಅವರಿಗೆ ತಿಳಿಸಿದರು.
ಸಂತೆ ವ್ಯಾಪಾರಿಗಳಿಗೆ ಮಾರುಕಟ್ಟೆ !
ನಗರದ ಮಡಿವಾಳದ ಸಂತೆ ಪ್ರದೇಶದಲ್ಲಿ ಮಾರುಕಟ್ಟೆ ನಿರ್ಮಿಸಿ ಸಂತೆಯ ಸಂದರ್ಭದಲ್ಲಿ ವ್ಯಾಪಾರ ನಡೆಸುತ್ತಿದ್ದ 440 ವ್ಯಾಪಾರಿಗಳಿಗೆ ಮಳಿಗೆಗಳನ್ನು ನಿರ್ಮಿಸಿ ಪುನರ್ವಸತಿ ಕಲ್ಪಿಸುವ ಕಾಮಗಾರಿಗಳ ಪ್ರಗತಿಯನ್ನು ಮುಖ್ಯಮಂತ್ರಿ ಪರಿಶೀಲಿಸಿದರು. ಮಡಿವಾಳ ಸಂತೆ ಪ್ರದೇಶದ ರಸ್ತೆಯ ಒಂದು ಬದಿಯಲ್ಲಿ ಮಾರುಕಟ್ಟೆ ಮೈದೇಳಿದರೆ ಮತ್ತೊಂದು ಬದಿಯಲ್ಲಿ 15 ಕೋಟಿ ರೂ ವೆಚ್ಚದಲ್ಲಿ 840 ಮೀಟರ್ ಚತುಷ್ಪಥ ಕಾಂಕ್ರೀಟ್ ರಸ್ತೆ ಸಜ್ಜುಗೊಳ್ಳಲಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದರು.
ರಿಮ್ಯಾಂಡ್ ಹೋಮ್‍ಗೆ ಹಠಾತ್ ಭೇಟಿ
ಅದೇ ರಸ್ತೆಯಲ್ಲಿದ್ದ ವೀಕ್ಷಣಾಲಯಕ್ಕೆ ಹಠಾತ್ ಭೇಟಿ ನೀಡಿದ ಸಿದ್ದರಾಮಯ್ಯ ಅವರು ಕಳ್ಳತನ, ಕೊಲೆಯೂ ಒಳಗೊಂಡಂತೆ ಗಂಭೀರ ಆರೋಪಗಳನ್ನು ಎದುರಿಸುತ್ತಿರುವ ಬಾಲಾಪರಾಧಿಗಳ ಸ್ಥಿತಿಗತಿಯನ್ನು ಪರಿಶೀಲಿಸಿದರು. ವೀಕ್ಷಣಾಲಯದಲ್ಲಿದ್ದ ಎಲ್ಲಾ 43 ಬಾಲಾಪರಾಧಿಗಳತ್ತಲೂ ಗಮನಹರಿಸಿದ ಮುಖ್ಯಮಂತ್ರಿಯವರು, ವಾರ್ಡ್‍ನ್ ನಿಮಗೆ ಹೋಡೀತಾರಾ ? ನಿಮಗೆ ಕೊಡುವ ಊಟ ಚೆನ್ನಾಗಿರುತ್ತಾ ? ಎಂದು ಮಾತಿಗೆ ಇಳಿದರಲ್ಲದೆ ಗೊತ್ತಿದ್ದೋ ಗೊತ್ತಿಲ್ಲದೆಯೋ ತಪ್ಪು ಮಾಡಿದ್ದೀರಿ. ಇನ್ನು ಮುಂದೆಯಾದರೂ ತಪ್ಪು ಮಾಡಲ್ಲ ಎಂದು ಶಪಥ ಮಾಡಿ, ಒಳ್ಳೆಯವರಾಗಿ ಬದುಕಿ ಎಂದು ಕಿವಿಮಾತು ಹೇಳಿದರು.
ಅಲ್ಲಿಂದ ಕೇಂದ್ರ ರೇಷ್ಮೆ ಮಂಡಳಿ ತೆರಳುವಾಗ ಸಂಚಾರ ದಟ್ಟಣೆಯನ್ನು ಕಡಿತಗೊಳಿಸಲು ಸಂಕೇತ-ಮುಕ್ತ ಮೇಲು ಸೇತುವೆ ನಿರ್ಮಾಣ ಕುರಿತಂತೆ ಅಧಿಕಾರಿಗಳೊಂದಿಗೆ ಚರ್ಚಿಸಿದ ಸಿದ್ದರಾಮಯ್ಯ ಅವರು 300 ಕೋಟಿ ರೂ ವೆಚ್ಚದಲ್ಲಿ ತಲೆ ಎತ್ತಲಿರುವ ಈ ಮೇಲು ಸೇತುವೆಗೆ 200 ಕೋಟಿ ರೂ ಒದಗಿಸುವಂತೆ ಬೆಂಗಳೂರು ಮೆಟ್ರೋ ರೈಲು ನಿಗಮದ ವ್ಯವಸ್ಥಾಪಕ ನಿರ್ದೇಶಕ ಪ್ರದೀಪ್ ಸಿಂಗ್ ಖರೋಲಾ ಅವರಿಗೆ ಹಾಗೂ 100 ಕೋಟಿ ರೂ ಒದಗಿಸುವಂತೆ ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರದ ಆಯುಕ್ತ ಟಿ ಶ್ಯಾಮ್ ಭಟ್ ಅವರಿಗೆ ತಾಕೀತು ಮಾಡಿದರು.
ಉದ್ಯಾನ ನಿರ್ಮಾಣ
ಹೆಚ್ ಎಸ್ ಆರ್ ಬಡಾವಣೆಯಲ್ಲಿ ಗುಡಿಸಲು ನಿವಾಸಿಗಳಿಂದ ಒತ್ತುವರಿಯಾಗಿದ್ದ ಎಂಟು ಎಕರೆ ಸರ್ಕಾರಿ ಭೂಮಿಯಲ್ಲಿ ಸ್ಥಳೀಯ ನಿವಾಸಿ ಹಾಗೂ ಶಾಸಕ ವಿ. ಎಸ್. ಉಗ್ರಪ್ಪ ಅವರ ನೇತೃತ್ವದಲ್ಲಿ ಅಲ್ಲಿನ ನಿವಾಸಿಗಳು ನಿರ್ಮಿಸಿರುವ ಉದ್ಯಾನದ ಅಭಿವೃದ್ಧಿಗೆ ಸರ್ಕಾರದ ವತಿಯಿಂದಲೂ ನೆರವು ಒದಗಿಸುವ ಭರವಸೆ ನೀಡಿದರು. ಉದ್ಯಾನದ ಜಮೀನನ್ನು ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರಕ್ಕೆ ಹಸ್ತಾಂತರಿಸುವಂತೆ ಬೆಂಗಳೂರು ನಗರ ಜಿಲ್ಲಾಧಿಕಾರಿಗೆ ಮುಖ್ಯಮಂತ್ರಿ ಸೂಚಿಸಿದರು.
ಕೆರೆ ಒತ್ತುವರಿ ತೆರವುಗೊಳಿಸಲು ಸೂಚನೆ
ನಂತರ, ಇಬ್ಬಲೂರು ಕೆರೆಗೆ ಭೇಟಿ ನೀಡಿದ ಮುಖ್ಯಮಂತ್ರಿಯವರು 18.6 ಎಕರೆ ಪ್ರದೇಶದ ಈ ಕೆರೆಯಲ್ಲಿ ಒಂಭತ್ತು ಎಕರೆ ಪ್ರದೇಶವು ಒತ್ತುವರಿಯಾಗಿರುವ ಬಗ್ಗೆ ಕಳವಳ ವ್ಯಕ್ತಪಡಿಸಿ, ಒತ್ತುವರಿ ತೆರವುಗೊಳಿಸುವಂತೆ ಬೆಂಗಳೂರು ನಗರ ಜಿಲ್ಲಾಧಿಕಾರಿ ವಿ ಶಂಕರ್ ಅವರಿಗೆ ನಿರ್ದೇಶನ ನೀಡಿದರು.
ಬೆಂಗಳೂರಿನಲ್ಲಿ 837 ಕೆರೆಗಳಿವೆ. ಅದರಲ್ಲಿ ಒತ್ತುವರಿಯಾಗಿರುವ ಕೆರೆ ಪ್ರದೇಶದ ವಿಸ್ತೀರ್ಣ 4232 ಎಕರೆ. ಈ ಬಗ್ಗೆ ವಿವರಣೆ ಪಡೆಯಲಾಗುತ್ತಿದೆ ಎಂದರು.
ರೈಲ್ವೇ ಮೇಲು ಸೇತುವೆ
ತದನಂತರ, ಕಗ್ಗದಾಸಪುರದಲ್ಲಿ 27 ಕೋಟಿ ರೂ ವೆಚ್ಚದಲ್ಲಿ ಪ್ರಾರಂಭವಾಗಲಿರುವ ರೈಲ್ವೇ ಮೇಲು ಸೇತುವೆ ಪ್ರದೇಶಕ್ಕೆ ಭೇಟಿ ಇತ್ತ ಸಿದ್ದರಾಮಯ್ಯ ಅವರು 650 ಕೋಟಿ ರೂ ವೆಚ್ಚದ ಮೇಲು ಸೇತುವೆ ನಿರ್ಮಾಣಕ್ಕೆ ಸಾರ್ವಜನಿಕರಿಂದ ಬೇಡಿಕೆ ಬಂದಿರುವ ಕೃಷ್ಣರಾಜಪುರ ಪ್ರದೇಶದ ಪರಿಶೀಲನೆ ನಡೆಸಿದರು. ಈ ಪ್ರಸ್ತಾವನೆ ಕುರಿತಂತೆ ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ ಹಾಗೂ ರಾಜ್ಯ ಸರ್ಕಾರದ ಪಾಲುದಾರಿಕೆ ಅಗತ್ಯವಿದೆ ಎಂದು ಅಭಿಪ್ರಾಯಪಟ್ಟರು.
ಮೆಟ್ರೋ ರೈಲಿನಲ್ಲಿ ಪ್ರಯಾಣ
ನಾಲ್ಕು ತಾಸುಗಳ ತಮ್ಮ ನಗರ ಪ್ರದಕ್ಷಿಣೆಯ ಕೊನೆಯ ಭಾಗವಾಗಿ ಬೈಯ್ಯಪ್ಪನಹಳ್ಳಿಯಿಂದ ವಿಧಾನಸೌಧದವರೆಗೆ ನಮ್ಮ ಮೆಟ್ರೋ ರೈಲಿನಲ್ಲಿ ಪ್ರಯಾಣಿಸಿದ ಸಿದ್ದರಾಮಯ್ಯ ಅವರು ತಮ್ಮ ಗೃಹ ಕಚೇರಿ ಕೃಷ್ಣಾದಲ್ಲಿ ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಮಾತನಾಡಿದರು. ರಾಜಕಾಲುವೆಗಳ ಸರ್ವೇಕ್ಷಣೆ
ಬೆಂಗಳೂರಿನಲ್ಲಿ ಎಲ್ಲಾ ರಾಜಕಾಲುವೆಗಳ ಸರ್ವೇಕ್ಷಣೆ ನಡೆಸಲು ಸೂಚಿಸಿರುವುದಾಗಿ ತಿಳಿಸಿದ ಸಿದ್ದರಾಮಯ್ಯ ಅವರು ರಾಜಕಾಲುವೆಗಳ ಒತ್ತುವರಿ ತೆರವುಗೊಳಿಸಲಾಗುವುದು ಎಂದರು.
ಅಂತೆಯೇ, ತಿಂಗಳಿಗೆ ಒಮ್ಮೆ ಬೆಂಗಳೂರು ನಗರ ಪ್ರದಕ್ಷಿಣೆ ಮಾಡಲು ಯೋಜಿಸಿರುವುದಾಗಿ ಮುಖ್ಯಮಂತ್ರಿ ಹೇಳಿದರು.
ಪ್ರಸಕ್ತ ಸಾಲಿನ ರಾಜ್ಯ ಆಯವ್ಯಯದಲ್ಲಿ ಬಸವೇಶ್ವರ ವೃತ್ತದಿಂದ ಹೆಬ್ಬಾಳದವರೆಗೆ 1500 ಕೋಟಿ ರೂ ವೆಚ್ಚದಲ್ಲಿ ನಿರ್ಮಿಸಲು ಉದ್ದೇಶಿಸಿರುವ ಮೇಲು ರಸ್ತೆ ತಮ್ಮ ನಗರ ಪ್ರದಕ್ಷಿಣೆಯ ಫಲಶೃತಿಯೇ ಎಂದು ಸಿದ್ದರಾಮಯ್ಯ ಸಮರ್ಥಿಸಿಕೊಂಡರು.
ಬೆಂಗಳೂರು ನಗರ ಜಿಲ್ಲಾ ಉಸ್ತುವಾರಿ ಸಚಿವರೂ ಆದ ಬೆಂಗಳೂರು ಅಭಿವೃದ್ಧಿ ಹಾಗೂ ನಗರ ಯೋಜನಾ ಸಚಿವ ಕೆ ಜೆ ಜಾರ್ಜ್, ಸಾರಿಗೆ ಸಚಿವ ರಾಮಲಿಂಗಾ ರೆಡ್ಡಿ, ಆಹಾರ, ನಾಗರೀಕ ಸರಬರಾಜು ಹಾಗೂ ಗ್ರಾಹಕ ವ್ಯವಹಾರಗಳ ಸಚಿವ ದಿನೇಶ್ ಗುಂಡೂರಾವ್, ಶಾಸಕರಾದ ಎಂ. ಕೃಷ್ಣಪ್ಪ, ಬಿ. ಎ. ಬಸವರಾಜ್, ಎಸ್. ಟಿ. ಸೋಮಶೇಖರ್, ಮುನಿರತ್ನ, ವಿನಿಷಾ ನೀರೋ, ಬೆಂಗಳೂರು ಮಹಾಪೌರ ಬಿ. ಎನ್. ಮಂಜುನಾಥ ರೆಡ್ಡಿ, ನಗರಾಭಿವೃದ್ಧಿ ಇಲಾಖೆಯ ಅಪರ ಮುಖ್ಯ ಕಾರ್ಯದರ್ಶಿ ಮಹೇಂದ್ರ ಜೈನ್ ಅವರೂ ಸೇರಿದಂತೆ ಹಲವು ಗಣ್ಯರು ನಗರ ಪ್ರದಕ್ಷಿಣೆಯ ಸಂದರ್ಭದಲ್ಲಿ ಮುಖ್ಯಮಂತ್ರಿಯವರ ಜೊತೆಗಿದ್ದರು.

ಜನ-ಮನ : ಸರ್ಕಾರದಿಂದ ಜನಾಭಿಪ್ರಾಯ ಸಮಾವೇಶ !

ಬೆಂಗಳೂರು, ಮೇ 12 : ಪ್ರಸಕ್ತ ಸರ್ಕಾರವು ಅಭಿವೃದ್ಧಿ ಕಾರ್ಯಗಳ ಯಶಸ್ಸಿನ ಹಾದಿಯಲ್ಲಿ 3 ವರ್ಷಗಳನ್ನು ಪೂರ್ಣಗೊಳಿಸುತ್ತಿರುವ ಹಿನ್ನೆಲೆಯಲ್ಲಿ ರಾಜ್ಯ ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆಯು ಮೇ 13 ರ ಶುಕ್ರವಾರ ಸಂಜೆ 4-00 ಗಂಟೆಗೆ ಬೆಂಗಳೂರಿನ ಬಳ್ಳಾರಿ ರಸ್ತೆಯಲ್ಲಿರುವ ಗಾಂಧೀ ಕೃಷಿ ವಿಜ್ಞಾನ ಕೇಂದ್ರ (ಜಿ.ಕೆ.ವಿ.ಕೆ.) ದಲ್ಲಿರುವ ಡಾ. ಬಾಬು ರಾಜೇಂದ್ರ ಪ್ರಸಾದ್ ಅಂತರ ರಾಷ್ಟ್ರೀಯ ಸಮಾವೇಶ ಭವನದಲ್ಲಿ "ಜನ-ಮನ" ಸರ್ಕಾರದಿಂದ ಜನಾಭಿಪ್ರಾಯ ಸಮಾವೇಶವನ್ನು ಹಮ್ಮಿಕೊಂಡಿದೆ.
ಪ್ರಸಕ್ತ ಸರ್ಕಾರವು ಅಧಿಕಾರಕ್ಕೆ ಬಂದ ಪ್ರಥಮ ದಿನವೇ ಘೋಷಣೆ ಮಾಡಿದ ಜನಪರ ಕಾರ್ಯಕ್ರಮಗಳನ್ನು ಪ್ರಥಮ ವರ್ಷವೇ ಅನುಷ್ಠಾನಗೊಳಿಸಿದ ಹೆಗ್ಗಳಿಕೆ ಹೊಂದಿದೆ. ಮೂರು ವರ್ಷಗಳ ಯಶಸ್ವಿ ಆಡಳಿತ ಪೂರೈಸಿ ನಾಲ್ಕನೇ ವರ್ಷದ ಹೊಸ್ತಿಲಿನಲ್ಲಿ ನಿಂತಿರುವ ಈ ಸುಸಂದರ್ಭದಲ್ಲಿ ಸರ್ಕಾರದ ಕಳೆದ ಮೂರು ವರ್ಷಗಳ ಕಾರ್ಯಕ್ರಮಗಳನ್ನು ಜನತೆಯ ಸಮ್ಮುಖದಲ್ಲಿ ಅವಲೋಕಿಸುವುದು, ಜನಾಭಿಪ್ರಾಯ ಪಡೆಯುವುದು ಈ ಜನಮನ-ಜನಾಭಿಪ್ರಾಯ ಸಮಾವೇಶದ ಆಶಯ. ಅನ್ನಭಾಗ್ಯ, ಕ್ಷೀರಭಾಗ್ಯ, ಋಣಮುಕ್ತಿ, ವಸತಿ ಭಾಗ್ಯ, ಆರೋಗ್ಯ ಭಾಗ್ಯಗಳಂತಹ ಪ್ರಮುಖ ಯೋಜನೆಗಳಲ್ಲದೆ ಗ್ರಾಮೀಣಾಭಿವೃದ್ಧಿ, ನಗರಾಭಿವೃದ್ಧಿ, ಕೈಗಾರಿಕೆ, ಸಮಾಜ ಕಲ್ಯಾಣ, ಆರೋಗ್ಯ ಕ್ಷೇತ್ರಗಳಲ್ಲಿ ಹಲವಾರು ಜನೋಪಯೋಗಿ ಕಾರ್ಯಕ್ರಮಗಳನ್ನು ಸರ್ಕಾರ ಬದ್ಧತೆಯಿಂದ ಜಾರಿಗೊಳಿಸಿದೆ.
ಅನ್ನಭಾಗ್ಯ, ಕ್ಷೀರಭಾಗ್ಯ ಕೇವಲ ಸಾಧಾರಣ ಸರ್ಕಾರಿ ಯೋಜನೆಗಳಲ್ಲ. ಅನ್ನಭಾಗ್ಯ-ಬರಗಾಲದ ಸಂಕಷ್ಟ ಪರಿಸ್ಥಿತಿಯಲ್ಲಿಯೂ ಬಡಜನರನ್ನು ಹಸಿವಿನಿಂದ ಮುಕ್ತಗೊಳಿಸಿ ರಕ್ಷಿಸಿದ ಯೋಜನೆ. ಅಂತೆಯೇ, ಕ್ಷೀರಭಾಗ್ಯ ಕೂಡ ನಮ್ಮ ಶಾಲಾ ಮಕ್ಕಳನ್ನು ಅಪೌಷ್ಠಿಕತೆಯಿಂದ ಕಾಪಾಡಿ ಪೌಷ್ಠ್ಟಿಕರವಾಗಿರಿಸಿದೆ. ಈ ಎರಡೂ ಯೋಜನೆಗಳು ರಾಜ್ಯದ ಬಡಜನತೆಯನ್ನು ಬರಗಾಲದ ತೀವ್ರತೆಯಿಂದ ಪಾರು ಮಾಡಿದ್ದು, ಸರ್ಕಾರದ ದೂರಗಾಮಿ ಹಾಗೂ ಶಾಶ್ವತ ಪರಿಹಾರದ ಯೋಜನೆಗಳಾಗಿ ಸಾಕ್ಷೀಕೃತಗೊಂಡಿವೆ.
ಜನಮನ – ಜನಾಭಿಪ್ರಾಯ ಸಮಾವೇಶ ಸರ್ಕಾರದ ಸಾಧನೆ ಮತ್ತು ಅದರ ಯೋಜನೆಗಳ ಅನುಷ್ಠಾನದಲ್ಲಿ ಆಗಿರುವ ಪ್ರಗತಿ ಹಾಗೂ ನ್ಯೂನತೆಗಳನ್ನು ಓರೆಗಲ್ಲಿಗೆ ಹಚ್ಚುವ ಪ್ರಯತ್ನ. ಇಲ್ಲಿ ವ್ಯಕ್ತವಾಗುವ ಅಭಿಪ್ರಾಯಗಳು ಆಡಳಿತ ಯಂತ್ರಕ್ಕೆ ಮಾರ್ಗದರ್ಶಿ ಸೂತ್ರಗಳಾಗಲಿವೆ.
ಈ ಸಮಾವೇಶಕ್ಕೆ ವಿಶೇಷ ಆಹ್ವಾನಿತರಾಗಿ ರಾಜ್ಯದ ಎಲ್ಲ ಜಿಲ್ಲೆಗಳಿಂದ ವಿವಿಧ ಯೋಜನೆಗಳ ಫಲಾನುಭವಿಗಳು ಆಗಮಿಸಿ. ಮಾನ್ಯ ಮುಖ್ಯಮಂತ್ರಿಗಳೊಂದಿಗೆ ತಮ್ಮ ಅಭಿಪ್ರಾಯವನ್ನು ಹಂಚಿಕೊಳ್ಳಲಿದ್ದಾರೆ. ಸಮಾಜದ ವಿವಿಧ ಸ್ಥರಗಳ ಜನಸಾಮಾನ್ಯರು, ಗಣ್ಯರ ಅಭಿಪ್ರಾಯಗಳನ್ನು ಮಾನ್ಯ ಮುಖ್ಯಮಂತ್ರಿಗಳ ಸಮ್ಮುಖದಲ್ಲಿ ಹಂಚಿಕೊಳ್ಳಲಾಗುವುದು. ಮಾನ್ಯ ಮೂಲಭೂತ ಸೌಲಭ್ಯ ಹಾಗೂ ವಾರ್ತಾ ಮತ್ತು ಹಜ್ ಸಚಿವ ಆರ್. ರೋಷನ್ ಬೇಗ್ ಅವರು ಸಮಾರಂಭದಲ್ಲಿ ಪ್ರಾಸ್ತಾವಿಕ ಭಾಷಣ ಮಾಡಲಿದ್ದಾರೆ. ಜನ-ಮನ ಜನಾಭಿಪ್ರಾಯ ಸಮಾವೇಶದಲ್ಲಿ ರಾಜ್ಯ ಸಚಿವ ಸಂಪುಟ ಸದಸ್ಯರುಗಳು ಭಾಗವಹಿಸಲಿದ್ದಾರೆ.
ಜನಾಭಿಪ್ರಾಯ ಮಂಡನೆಯ ಈ ಕಾರ್ಯಕ್ರಮದಲ್ಲಿ ಅನ್ನಭಾಗ್ಯ, ಕ್ಷೀರಭಾಗ್ಯ, ಕ್ಷೀರಧಾರೆ, ವಿದ್ಯಾಸಿರಿ, ನಮ್ಮ ಮೆಟ್ರೋ, ಕೃಷಿಭಾಗ್ಯ, ರಾಜೀವ್ ಆರೋಗ್ಯ ಭಾಗ್ಯ, ಶುದ್ಧನೀರು, ಋಣಮುಕ್ತ, ಮನಸ್ವಿನಿ, ಮೈತ್ರಿ, ನಿರ್ಮಲ ಭಾಗ್ಯ ಯೋಜನೆಯ ಫಲಾನುಭವಿಗಳು ಪಾಲ್ಗೊಳ್ಳುವರು.

ಎಂಟಿಆರ್ ಫುದ್ಶ್‌ಗೆ ಹೊಸ ಬ್ರಾಂಡ್ ಗುರುತು

ಬೆಂಗಳೂರು, ಮೇ 3, 2016: ಯುವ ಸಮೂಹವನ್ನು ಗುರಿಯಾಗಿಟ್ಟುಕೊಂಡು ಎಂಟಿಆರ್ ಫುಡ್ಸ್ ಪ್ರೈ ಲಿ. ಸಂಸ್ಥೆ ಹೊಸ ಬ್ರಾಂಡ್ ಗುರುತು ಮತ್ತು ಸಮಕಾಲೀನ ಪ್ರಜ್ಞೆಯನ್ನು ಪ್ರತಿಬಿಂಬಿಸುವ ಲೋಗೋವನ್ನು ಬಿಡುಗಡೆ ಮಾಡಿದೆ. ಸಂಸ್ಥೆಯ ರೀ ಬ್ರಾಂಡಿಂಗ್ ಪ್ರಕ್ರಿಯೆ ಸಕ್ರಿಯ ಗ್ರಾಹಕರನ್ನು ತಲುಪುವ ಉದ್ದೇಶ ಹೊಂದಿದೆ. ಹೊಸ ಲೋಗೊ ಮತ್ತು ಪ್ಯಾಕೇಜಿಂಗ್ ತಕ್ಷಣವೇ ಜಾರಿಗೆ ಬರಲಿದೆ. ಮೇ ತಿಂಗಳಲ್ಲಿಯೇ ಹೊಸ ಪ್ಯಾಕ್‍ಗಳು ಮಾರುಕಟ್ಟೆಗೆ ಬರಲಿವೆ.
ಕಳೆದ ಕೆಲವು ವರ್ಷಗಳಿಂದ ಗ್ರಾಹಕರ ಸ್ವಭಾವದಲ್ಲಿ ಸಾಕಷ್ಟು ಬದಲಾವಣೆಗೊಂಡಿವೆ. ಇದಕ್ಕೆ ಪೂರಕವಾಗಿ ಕಂಪೆನಿಯ ಬ್ರಾಂಡ್ ಪೊಸಿಷನಿಂಗ್ ಸಹ ಬದಲಾಗಬೇಕೆಂಬ ಉದ್ದೇಶದಿಂದ ರೀಬ್ರಾಂಡಿಂಗ್ ಮಾಡಲಾಗಿದೆ. ಗ್ರಾಹಕರ ಅಗತ್ಯತೆ ಮತ್ತು ಬಯಕೆಗಳನ್ನು ಗಮನದಲ್ಲಿಟ್ಟುಕೊಂಡು ಎಂಟಿಆರ್ ಫುಡ್ಸ್ ಕಳೆದ ಮೂರು ವರ್ಷಗಳಲ್ಲಿ 44 ಹೊಸ ಉತ್ಪನ್ನಗಳನ್ನು ಬಿಡುಗಡೆ ಮಾಡಿದೆ.
ಅಭಿವೃದ್ಧಿ ಕಾರ್ಯತಂತ್ರದ ಭಾಗವಾಗಿ ಕಂಪೆನಿಯು ತನ್ನ ಹೊಸ ಇ ವಾಣಿಜ್ಯ ತಾಣವನ್ನೂ ಆರಂಭಿಸಿದ್ದು ಇಲ್ಲಿ ಕಂಪೆನಿಯ 140ಕ್ಕೂ ಹೆಚ್ಚು ಉತ್ಪನ್ನಗಳನ್ನು ಗ್ರಾಹಕರು ನೇರವಾಗಿ ಆಯ್ಕೆ ಮಾಡಿ ಖರೀದಿಸಬಹುದು.
ರೀಬ್ರಾಂಡಿಂಗ್‍ನ ಅಗತ್ಯತೆಯನ್ನು ಒತ್ತಿ ಹೇಳಿದ ಎಂಟಿಆರ್ ಫುಡ್ಸ್‍ನ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಸಂಜಯ ಶರ್ಮ ಅವರು “ಇಂದಿನ ಗ್ರಾಹಕರು ಬದಲಾಗುತ್ತಿದ್ದಾರೆ. ಅವರ ಆಹಾರ ಅಗತ್ಯತೆಗಳು ಮತ್ತು ಬಳಕೆಯ ರೀತಿಯೂ ಬದಲಾಗುತ್ತಿದೆ. ಅವರು ಭಾರತೀಯ ಆಹಾರವನ್ನು ಇಷ್ಟಪಡುತ್ತಾರೆ. ಆದರೆ ಇದರ ಸಿದ್ಧತೆ ತೀರಾ ಕಷ್ಟ ಮತ್ತು ಸಮಯ ತೆಗೆದುಕೊಳ್ಳುತ್ತದೆ ಎಂದು ಭಾವಿಸುತ್ತಾರೆ. ನಮ್ಮ ಬ್ರಾಂಡ್ ಹೊಸ ಬಗೆಯದ್ದಾಗಿದ್ದು, ಬಳಸಲು ಸುಲಭವಾದ, ಪೌಷ್ಠಿಕವಾದ ಮತ್ತು ಅಪ್ಪಟ ರುಚಿಯ ಉತ್ಪನ್ನಗಳು ನಮ್ಮಲ್ಲಿವೆ ಎಂಬುದನ್ನು ಪ್ರಚುರಪಡಿಸುತ್ತದೆ. ಗ್ರಾಹಕರಿಗೆ ಭಾರತೀಯ ಆಹಾರ ಸುಲಭವಾಗಿ, ಸಮಯದ ಪ್ರಶ್ನೆಯಿಲ್ಲದೇ ದೊರೆಯುವಂತೆ ಮಾಡುವ ಪ್ರಯತ್ನ ಮಾಡುತ್ತದೆ” ಎಂದರು.
ಒಂದು ಬ್ರಾಂಡ್ ಆಗಿ ಇಂದು ನಾವು ಬದಲಾದ ನಮ್ಮ ಮುಖ್ಯ ಗ್ರಾಹಕರಿಗೆ ತಕ್ಕಂತೆ ಬದಲಾಗಬೇಕಾಗಿತ್ತು. ಹೊಸ ಬ್ರಾಂಡ್ ಗುರುತು ಇಂದು ಕಂಪೆನಿಯಿರುವ ಸ್ಥಾನವನ್ನು ಪ್ರತಿನಿಧಿಸುತ್ತದೆ. ನಮ್ಮ ವಿವರವಾದ ಅಭಿವೃದ್ಧಿ ಕಾರ್ಯತಂತ್ರ ಮುಂದಿನ ಭವಿಷ್ಯಕ್ಕೆ ಎಂಟಿಆರ್ ಸಿದ್ಧವಾಗಿದೆ ಎಂಬುದನ್ನು ಶ್ರುತಪಡಿಸುತ್ತದೆ. ಎಂಟಿಆರ್ ಫುಡ್ಸ್‍ಗೆ ಇದು ಹೊಸ ಆರಂಭ. ಈ ಬದಲಾಔಣೆಗಳು ಮತ್ತು ನಮ್ಮ ಹೊಸ ಬ್ರಾಂಡ್ ಗುರುತು ನಮ್ಮ ಗ್ರಾಹಕರ ಪ್ರತಿನಿತ್ಯದ ಭಾಗವಾಗಿ ನಮ್ಮನ್ನು ಮಾಡಲಿದೆ ಎಂಬ ವಿಶ್ವಾಸವನ್ನು ಹೊಂದಿದ್ದೇವೆ ಎಂದು ಹೇಳಿದರು.
ಓಕ್ರ್ಲಾ ಫುಡ್ಸ್‍ನ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಮತ್ತು ಕಾರ್ಯಕಾರಿ ಉಪಾಧ್ಯಕ್ಷರಾದ ಆಟ್ಲೆ ವಿದಾರ್ ಮಾತನಾಡಿ ‘ಕಳೆದ ಮೂರು ವರ್ಷಗಳಲ್ಲಿ ಓಕ್ರ್ಲಾ ಫುಡ್ಸ್ ಒಂದು ಪ್ರಮುಖ ನೋರ್ಡಿಕ್ ಬ್ರಾಂಡೆಡ್ ಗ್ರಾಹಕ ಕಂಪೆನಿಯಾಗಿ ಪವಿರ್ತನೆಗೊಂಡಿದೆ. ಇದು ಎಂಟಿಆರ್ ಫುಡ್ಸ್‍ನ ಬೆಳವಣಿಗೆಯಲ್ಲಿ ಸಕಾರಾತ್ಮಕ ಪಾಲುದಾರಿಕೆಯ ಪಾತ್ರ ವಹಿಸಲಿದೆ. ಎಂಟಿಆರ್‍ನಂಥ ಬ್ರಾಂಡ್‍ನ ಮಾಲೀಕರು ನಾವೆನ್ನುವುದಕ್ಕೆ ನಮಗೆ ಹೆಮ್ಮೆ ಇದೆ. ಈ ಬ್ರಾಂಡ್‍ನ ಬೆಳವಣಿಗೆ ಮತ್ತು ಗ್ರಾಹಕರ ಒಳನೋಟಕ್ಕೆ ಅನುಗುಣವಾಗಿ ಅದರ ಸುಲಲಿತ ಪರಿವರ್ತನೆಯಲ್ಲಿ ನಾವೂ ಕೊಡುಗೆ ನೀಡುತ್ತೇವೆ. ಹೊಸ ಬ್ರಾಂಡ್ ಗುರುತಿನ ಆರಂಭ ನಮ್ಮ ಪಾಲುದಾರಿಕೆ ಮತ್ತು ಜಂಟಿ ಅಭಿವೃದ್ಧಿಯ ಹಾದಿಯ ಹೆಗ್ಗುರುತಾಗಿದೆ” ಎಂದು ನುಡಿದರು.

‘ಗ್ರಾಮೀಣ ಅಂಗಡಿ’ಯಲ್ಲಿ ಕಿರುಧಾನ್ಯಗಳ ಪ್ರದರ್ಶನ ಮತ್ತು ಮಾರಾಟ

ಗ್ರಾಮೀಣ ಅಂಗಡಿ (ಗ್ರಾಮೀಣ ಕರಕುಶಲ ಉದ್ಯಮದ ಘಟಕ) ಯಿಂದ “ಉತ್ತಮ ಆರೊಗ್ಯಕ್ಕಾಗಿ ಆಹಾರ- ಆಹಾರಕ್ಕಾಗಿ ಕಿರುಧಾನ್ಯಗಳು” ಎಂಬ ಘೋಷಣೆಯಡಿ ರಾಜಾಜಿನಗರ ಮತ್ತು ಜಯನಗರದಲ್ಲಿರುವ ಗ್ರಾಮೀಣ ಅಂಗಡಿಯಲ್ಲಿ ಕಿರುಧಾನ್ಯಗಳ ಪ್ರದರ್ಶನ ಮತ್ತು ಮಾರಾಟವನ್ನು ಏಪ್ರಿಲ್ 4, 2016 ರಿಂದ ಆರಂಭಿಸಲಾಗಿದೆ.

ಪ್ರದರ್ಶನದಲ್ಲಿ ಜೋಳ, ಸಜ್ಜೆ, ನವಣೆ, ಸಾಮೆ, ಆರ್ಕ, ರಾಗಿ, ಊದಲು, ಬರಗು, ಜವೆ, ಗೋದಿ, ಉದ್ದನೆಯ ತಳಿಯ ಅಕ್ಕಿ ಮುಂತಾದ ಶ್ರೇಷ್ಠ ಆಹಾರ ಧಾನ್ಯಗಳು ‘ಗ್ರಾಮೀಣ ಅಂಗಡಿ’ ಯಲ್ಲಿ ದೊರೆಯಲಿವೆ. ಈಗಾಗಲೇ ಗ್ರಾಮೀಣ ಕರಕುಶಲ ಉತ್ಪನ್ನಗಳು ಮತ್ತು ಕೈಮಗ್ಗ ಮತ್ತು ಖಾದಿ ಉತ್ಪನ್ನ ಮಾಡುವ ಕರಕುಶಲ ಕರ್ಮಿಗಳ ಸಬಲೀಕರಣಕ್ಕಾಗಿ ಮಾರುಕಟ್ಟೆ ವ್ಯವಸ್ಥೆ ಮಾಡುತ್ತಿರುವ “ಗ್ರಾಮೀಣ ಅಂಗಡಿ” ಯಲ್ಲಿ ಈಗ ಕಿರುಧಾನ್ಯಗಳು ಮತ್ತು ಸಾವಯವ ತರಕಾರಿಗಳನ್ನು ನಗರದ ಜನತೆಗೆ ದೊರೆಯುವಂತೆ ಮಾಡಲಾಗಿದೆ.

ಆರೋಗ್ಯಕ್ಕೆ ಮಾರಕವಾಗುವ ಒಂದೇ ತೆರನಾದ ಮೈದಾ ಹಿಟ್ಟಿನಿಂದ ತಯಾರಾಗುವ ಪಿಜ್ಝಾ, ಬರ್ಗರ್, ಬ್ರೆಡ್, ಕೇಕ್, ಕೊಕಾ ಕೋಲಾ, ಪೆಪ್ಸಿ, ಮುಂತಾದ ಅತಿಯಾದ ರಸಾಯನಗಳು ಮತ್ತು ಪ್ರಚೋದಕ ಆಹಾರ ಪದಾರ್ಥಗಳನ್ನು ಬಳಸುವ ಬದಲಿಗೆ ನಮ್ಮ ದೇಹಕ್ಕೆ ಬೇಕಾದ ನಾರು, ಪಿಷ್ಟ, ಪೌಷ್ಠಿಕಾಂಶಗಳ್ಳುಳ ಕಿರು ಆಹಾರ ಧಾನ್ಯಗಳನ್ನು ಉಪಯೋಗಿಸಬೇಕೆಂದು ಗ್ರಾಮಿಣ ಅಂಗಡಿ ಬಳಗ ಜನತೆಯಲ್ಲಿ ಮನವಿ ಮಾಡುತ್ತದೆ.

ಪ್ರದರ್ಶನ ಮತ್ತು ಮಾರಾಟ: ರಾಜಾಜಿನಗರ: ನಂ. 299/45, 10ನೇ ಮುಖ್ಯ ರಸ್ತೆ, 4ನೇ ಬ್ಲಾಕ್, (ರಾಮ ಮಂದಿರದ ಹಿಂಭಾಗ, ಕೆನರಾ ಬ್ಯಾಂಕ್ ಎದುರು) ರಾಜಾಜಿನಗರ, ಬೆಂಗಳೂರು- 5600010,  ಪೋನ್ 080-23404727, ಜಯನಗರ: ಗ್ರಾಮೀಣ ಅಂಗಡಿ, ನಂ8, 11ನೇ ಮುಖ್ಯ ರಸ್ತೆ, 39ನೇ ಎ ಕ್ರಾಸ್, 4ನೇ ಟಿ ಬ್ಲಾಕ್, ಶ್ಯಾಲಿನಿ ಮೈದಾನದ ಹತ್ತಿರ, ಜಯನಗರ ಬೆಂಗಳೂರು-560048, ಪೋನ್ ನಂ. 080-22441835,ಮೊ: 9448324727

ಗೃಹ ಶುದ್ಧೀಕರಣ ಮಾರುಕಟ್ಟೆ ಪ್ರವೇಶಿಸಿದ ಟಿಟಿಕೆ ಪ್ರೆಸ್ಟೀಜ್

ಮನೆ ಸ್ವಚ್ಛಗೊಳಿಸುವ ನವನವೀನ ಉತ್ಪನ್ನಗಳ ಶ್ರೇಣಿಗಳನ್ನು ಹೊಂದಿರುವ ಹೊಸ ಪ್ರೆಸ್ಟೀಜ್ ಕ್ಲೀನ್‍ಹೋಮ್ ಬಿಡುಗಡೆ  

• ದಶಕಗಳ ಕಾಲ ಭಾರತದ ಅಡುಗೆಮನೆಗಳಲ್ಲಿ ನಂಬರ್ ಒನ್ ಸ್ಥಾನ ಪಡೆದಿದ್ದ ಬಳಿಕ ಮೊದಲ ಬಾರಿಯ ವಿಸ್ತರಣೆ 

• ಮೂಲ ಗ್ರಾಹಕರೆಡೆಗಿನ ಗಮನ ಮುಂದುವರಿಕೆ- ಭಾರತೀಯ ಗೃಹಿಣಿಯರು, ಸುಮಾರು 60 ವರ್ಷಗಳಿಂದ ಪೋಷಿಸಲ್ಪಟ್ಟಿರುವ ಸಂಬಂಧ

• 2016-17ರ ವಿತ್ತೀಯ ವರ್ಷದಲ್ಲಿ ಸಂಸ್ಥೆಯ ಆದಾಯದ ಶೇ. 5ರಷ್ಟು ಹೊಸ ಯೋಜನೆಯಿಂದ ಗಳಿಸುವ ನಿರೀಕ್ಷೆ. 

• ಏಕಕಾಲದಲ್ಲಿ ಗುಡಿಸುವ, ಒರೆಸುವ ಹಾಗೂ ಉಜ್ಜುವ ವಿಶ್ವದ ಮೊದಲ ದೇಶೀಯ ಎಲೆಕ್ಟ್ರಿಕ್ ಮೋಪ್, ವ್ಯಾಕ್ಯೂಮ್ ಕ್ಲೀನರ್ ಕಂ ಫ್ಲೋರ್ ಪಾಲಿಶರ್ ಮತ್ತು ಬಹೂಪಯೋಗಿ ಸ್ಟೀಮ್ ಕ್ಲೀನರ್ ಈ ನವನವೀನ ಉತ್ಪನ್ನಗಳ ಶ್ರೇಣಿಯಲ್ಲಿ ಒಳಗೊಂಡಿದೆ.

ಬೆಂಗಳೂರು, ಏಪ್ರಿಲ್ 28,2016: ಭಾರತದ ಬೃಹತ್ ಕಿಚನ್ ಹೋಮ್ ಅಪ್ಲೆಯನ್ಸ್ ಬ್ರಾಂಡ್ ಆಗಿರುವ ಟಿಟಿಕೆ ಪ್ರೆಸ್ಟೀಜ್, ಭಾರತೀಯ ಅಡುಗೆ ಮನೆ ಶುದ್ಧೀಕರಣ ಮಾರುಕಟ್ಟೆಗೆ(ಹೋಮ್ ಕ್ಲೀನಿಂಗ್ ಮಾರ್ಕೇಟ್) ಪ್ರವೇಶಿಸಿರುವುದಾಗಿ ಇಂದು ಘೋಷಿಸಿದೆ. ಕಳೆದ 60 ವರ್ಷಗಳಿಂದ ಮಾರುಕಟ್ಟೆಯಲ್ಲಿ ತನ್ನ ಸ್ಥಾನವನ್ನು ಭದ್ರಪಡಿಸಿಕೊಂಡಿರುವ ಕಂಪನಿಯು ಅದಕ್ಕೆ ಸರಿಸಮನಾಗಿ, ಇದೇ ಮೊದಲ ಬಾರಿಗೆ ಕಿಚನ್ ಅಪ್ಲೆಯನ್ಸ್ ಹೊರತುಪಡಿಸಿದ ಕ್ಷೇತ್ರಕ್ಕೆ ಲಗ್ಗೆ ಇಡುತ್ತಿದೆ. ಪ್ರಸ್ತುತ ಗೃಹ ಶುದ್ಧೀಕರಣ ಕ್ಷೇತ್ರವು ಸುಮಾರು 2500 ಕೋಟಿ ರೂ. ಗಳಷ್ಟು ವಹಿವಾಟು ಮಾಡುವಷ್ಟು ವ್ಯಾಪ್ತಿಯನ್ನು ವಿಸ್ತರಿಸಿಕೊಂಡಿದ್ದು, ವರ್ಷದಿಂದ ವರ್ಷಕ್ಕೆ 15ರಿಂದ20 ಶೇ. ದಷ್ಟು ಅಭಿವೃದ್ಧಿಯನ್ನು ಕಾಣುತ್ತಿದೆ. 

ಪ್ರೆಸ್ಟೀಜ್ ಕ್ಲೀನ್ ಹೋಮ್ ಹೆಸರಿನಡಿ ಈ ಹೊಸ ಯೋಜನೆಯನ್ನು ಅನಾವರಣ ಮಾಡಲಾಗಿದ್ದು, ಮುಂದಿನ ದಿನಗಳಲ್ಲಿ ಭಾರತದಲ್ಲೇ ಮೊದಲ ಬಾರಿಗೆ ಎನ್ನುವಂತೆ ಎಲೆಕ್ಟ್ರಿಕ್ ಮೋಪ್, ವ್ಯಾಕ್ಯೂಮ್ ಕ್ಲೀನರ್ ಕಂ ಫೆÇ್ಲೀರ್ ಪಾಲಿಶರ್, ಬಹೂಪಯೋಗಿ ಸ್ಟೀಮ್ ಕ್ಲೀನರ್ ಇತ್ಯಾದಿ ವಿಭಿನ್ನ ಉತ್ಪನ್ನಗಳನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಲಾಗುತ್ತದೆ. ಗೃಹ ಶುದ್ಧೀಕರಣ ವಿಭಾಗ ಹಾಗೂ ಕಿಚನ್ ಅಪ್ಲೆಯನ್ಸ್‍ಗಳು ಭಾರತೀಯ ಗೃಹಿಣಿಯರ ಬೆನ್ನೆಲುಬು ಅಥವಾ ಹಿತೈಷಿಯಾಗಿದ್ದು, ದೇಶದ ಲಕ್ಷಗಟ್ಟಲೆ ಮಹಿಳೆಯರ ಜೀವನ ಮಟ್ಟವನ್ನು ಸುಧಾರಿಸುವ ಸಂಭಾವ್ಯ ಅವಕಾಶವನ್ನು ಹೊಂದಿದೆ. 

ಟಿಟಿಕೆ ಸಮೂಹಗಳ ಅಧ್ಯಕ್ಷರಾದ ಶ್ರೀ ಟಿ ಟಿ ಜಗನ್ನಾಥನ್ ಅವರು ಮಾತನಾಡಿ ``ಟಿಟಿಕೆ ಪ್ರೆಸ್ಟೀಜ್ ಎಲ್ಲ ಭಾರತೀಯರ ಅಡುಗೆ ಮನೆಯ ಆಸ್ತಿಯಾಗಿದೆ. ಭಾರತದ ಬೃಹತ್ ಕಿಚನ್ ಅಪ್ಲೆಯನ್ಸ್ ಕಂಪನಿಯಾಗಿ, ನಾವು 60 ವರ್ಷಗಳ ಇತಿಹಾಸವನ್ನು ಹೊಂದಿದ್ದು, ನಾನಾ ಆವಿಷ್ಕಾರ ಹಾಗೂ ಹೊಸತನಗಳ ಮೂಲಕ ದೇಶದ ಬಹುಪಾಲು ಜನರ ಆಯ್ಕೆಯ ಬ್ರಾಂಡ್ ಆಗಿ ಹೊರಹೊಮ್ಮಿದ್ದೇವೆ. ಹೀಗಾಗಿ ಇದು ನಮಗೆ ಸಕಾಲವಾಗಿದ್ದು, ಗೃಹ ಶುದ್ಧೀಕರಣ ಕ್ಷೇತ್ರಕ್ಕೆ ಪ್ರವೇಶ ಮಾಡುವ ಮೂಲಕ ನಮ್ಮ ಹೆಜ್ಜೆಯಲ್ಲಿ ಒಂದಡಿ ಮುಂದೆ ಇಡುತ್ತಿದ್ದೇವೆ. ಅಡುಗೆ ಮನೆ ನಿರ್ವಹಣೆ ಮಾಡುವವರಿಗೆ ಇನ್ನಷ್ಟು ಮೌಲ್ಯವರ್ಧಿತ ಉತ್ಪನ್ನಗಳನ್ನು ನೀಡುವುದೇ ನಮ್ಮ ಗುರಿಯಾಗಿದ್ದು, ಅತ್ಯುತ್ತಮ ಗುಣಮಟ್ಟದ ಗೃಹ ಶುದ್ಧೀಕರಣ ಉತ್ಪನ್ನಗಳನ್ನು ಒದಗಿಸುವ ಮೂಲಕ ಈ ಕ್ಷೇತ್ರದಲ್ಲೂ ಮೊದಲ ಸ್ಥಾನವನ್ನು ಪಡೆಯುವಂಥ ನಿರೀಕ್ಷೆಯನ್ನು ಹೊಂದಿದ್ದೇವೆ," ಎಂದು ಹೇಳಿದರು. 

ಸೋರ್ಸಿಂಗ್, ಸಂಶೋಧನೆ ಮತ್ತು ಅಭಿವೃದ್ಧಿ, ಗುಣಮಟ್ಟ ಮತ್ತು ಮಾರಾಟ ಹಾಗೂ ಮಾರ್ಕೆಟಿಂಗ್ ಸೇರಿದಂತೆ 50ಕ್ಕೂ ಹೆಚ್ಚು ವೃತ್ತಿಪರ ತಂಡವು ಹೊಸ ವಿಭಾಗದಲ್ಲಿ ಛಾಪು ಮೂಡಿಸುವುದಕ್ಕಾಗಿ ಕಾರ್ಯ ನಿರ್ವಹಿಸುತ್ತಿದೆ. 571 ಸ್ಮಾರ್ಟ್ ಕಿಚನ್ ಸ್ಟೋರ್ ಸೇರಿದಂತೆ ದೇಶದ 50,000ಕ್ಕಿಂತಲೂ ಹೆಚ್ಚು ರಿಟೇಲ್ ಸ್ಟೋರ್‍ಗಳಲ್ಲಿ ಈ ಗೃಹ ಶುದ್ಧೀಕರಣ ವಸ್ತುಗಳು ಲಭ್ಯವಿರಲಿದೆ. ಅದೇ ರೀತಿ ಪ್ರಮುಖ ಇ ಕಾಮರ್ಸ್ ಸ್ಟೋರ್‍ಗಳಲ್ಲೂ ಸಿಗಲಿದೆ. ಪ್ರಸ್ತುತ ಬೆಂಗಳೂರು, ಚೆನ್ನೈ, ದೆಲ್ಲಿಯಲ್ಲಿ ಈ ವಸ್ತುಗಳನ್ನು ಪ್ರಾಯೋಗಿಕವಾಗಿ ಮಾರುಕಟ್ಟೆಗೆ ಬಿಡಲಾಗಿದೆ. ಪ್ರೆಸ್ಟೀಜ್ ಕ್ಲೀನ್ ಹೋಮ್ ಮುಂದಿನ ವರ್ಷದಲ್ಲಿ ಕಂಪನಿಯ ಒಟ್ಟು ಆದಾಯದಲ್ಲಿ 5ಶೇ. ರಷ್ಟು ಗಳಿಕೆ ಮಾಡಲಿದೆ. 

ಪ್ರೆಸ್ಟೀಜ್ ಕ್ಲೀನ್ ಹೋಮ್‍ನಲ್ಲಿ ಎಲೆಕ್ಟ್ರಿಕ್, ನಾನ್ ಎಲೆಕ್ಟ್ರಿಕ್ ಶ್ರೇಣಿಯಲ್ಲಿ ಹೊಸ ಆವಿಷ್ಕಾರದ ನೆಲ, ಗಾಳಿ ಮತ್ತು ನೀರಿನ ರಕ್ಷಣೆಯ ಉತ್ಪನ್ನಗಳನ್ನು ಹೊಂದಿದ್ದು, ಬಳಸುವುದಕ್ಕೆ ಅತ್ಯಂತ ಸುಲಭವಾಗಿದೆ. ಎಲೆಕ್ಟ್ರಿಕ್ ಮೋಪ್ಸ್, ವ್ಯಾಕ್ಯೂಮ್ ಕ್ಲೀನರ್, ಫೆÇ್ಲೀರ್ ಪಾಲೀಶರ್, ಸ್ಟೀಮ್ ಕ್ಲೀನರ್, ಏರ್ ಫ್ಯೂರಿಫೈಯರ್‍ಗಳು ಎಲೆಕ್ಟ್ರಿಕ್ ವಿಭಾಗದಲ್ಲಿದೆ. ಅಂತೆಯೇ ನಾನ್ ಎಲೆಕ್ಟ್ರಿಕ್ ವಿಭಾಗದಲ್ಲಿ ಸ್ಟಿಕ್ ಮೋಪ್ಸ್, ಟ್ವಿಸ್ಟರ್ ಮೋಪ್, ಸ್ಕ್ವೀಸ್ ಮೋಪ್, ಮ್ಯಾಜಿಕ್ ಮೋಪ್ಸ್, ಸ್ಪ್ರೇ ಮೋಪ್ಸ್, ಲ್ಯಾಡರ್ಸ್ ಹಾಗೂ ಫ್ಲಿಪ್ ಬಿನ್‍ಗಳಿವೆ. 

ಪ್ರಸ್ತುತ ಗೃಹ ಶುದ್ಧೀಕರಣಕ್ಕೆ ಬಳಸುವಂಥ ಪದ್ಧತಿಗಳಲ್ಲಿರುವ ತೊಂದರೆಗಳನ್ನು ನಿವಾರಿಸುವ ರೀತಿಯಲ್ಲಿ ಈ ಎಲ್ಲ ಶ್ರೇಣಿಯ ಉತ್ಪನ್ನಗಳನ್ನು ತಯಾರಿಸಲಾಗಿದ್ದು, ಶುಚಿ ಮಾಡುವ ಪ್ರಕ್ರಿಯೆಯನ್ನು ಹೆಚ್ಚು ನಿರ್ಮಲ ಹಾಗೂ ಸಮರ್ಥವಾಗಿಸುತ್ತದೆ. ಭಾರತದಲ್ಲಿ ಮನೆಯ ಸ್ವಚ್ಛತೆ ಮಾಡುವ ರೀತಿಯನ್ನು ಪ್ರೆಸ್ಟೀಜ್ ಕ್ಲೀನ್ ರೂಪಾಂತರಗೊಳಿಸುತ್ತದೆ ಹಾಗೂ ಧೂಳು ಹಾಗೂ ಮಾಲಿನ್ಯವನ್ನು ಕಡಿಮೆ ಮಾಡುವ ಮೂಲಕ ಅಲರ್ಜಿ ಹಾಗೂ ಇನ್ನಿತ್ಯಾದಿ ಸಮಸ್ಯೆಗಳಿಂದ ಮುಕ್ತಿ ಒದಗಿಸಿ ಆರೋಗ್ಯವನ್ನು ಒದಗಿಸುತ್ತದೆ. ಸುಂದರ ವಿನ್ಯಾಸ ಹಾಗೂ ಉತ್ಪನ್ನಗಳು ಹೊಂದಿರುವ ದಕ್ಷತೆಯ ಅಂಶಗಳು ಬಳಕೆದಾರರಿಗೆ ಗರಿಷ್ಠ ಆರಾಮದಾಯಕತೆಯನ್ನು ಒದಗಿಸುತ್ತದೆ. 

ಟಿಟಿಕೆ ಪ್ರೆಸ್ಟೀಜ್‍ನ ವ್ಯವಸ್ಥಾಪಕ ನಿರ್ದೇಶಕರಾದ ಶ್ರೀ ಚಂದ್ರು ಕಾಲ್ರೋ ಅವರು ಮಾತನಾಡಿ “ಭಾರತೀಯರು ಅಡುಗೆ ಮಾಡುವ ವಿಧಾನವನ್ನು ಬದಲಾಯಿಸಿದ ಬಳಿಕ, ಭಾರತೀಯರು ಸ್ವಚ್ಛಗೊಳಿಸುವ ವಿಧಾನವನ್ನು ಬದಲಾಯಿಸಿಕೊಳ್ಳುವಲ್ಲಿ ಬದ್ಧರಾದೆವು. ಭಾರತದಲ್ಲಿ ಮನೆಗಳನ್ನು ಸ್ವಚ್ಛಗೊಳಿಸುವ ವಿಧಾನವನ್ನು ಬದಲಾಯಿಸುವಂಥ ಉನ್ನತ ಗುಣಮಟ್ಟದ ಉತ್ಪನ್ನಗಳ ಶ್ರೇಣಿಯನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡುವ ಅಗತ್ಯವಿದೆ. ಆರೋಗ್ಯ, ಅನುಕೂಲ ಮತ್ತು ಆಧುನಿಕ ಜೀವನ ಶೈಲಿಯು ಮನೆ ಸ್ವಚ್ಚಗೊಳಿಸುವ ಹೊಸ ವಿಧಾನವನ್ನು ಬೇಡುತ್ತದೆ. ಈ ಒಂದು ವಿಚಾರವನ್ನು ದೇಶದ ಇತರೆ ಯಾವುದೆ ಬ್ರಾಂಡ್ ಸಮಗ್ರವಾಗಿ ಅರ್ಥ ಮಾಡಿಕೊಂಡಿಲ್ಲ. ಈಗ ನಮ್ಮ ಗ್ರಾಹಕರಿಗೆ ಹೊಸ ಮಟ್ಟದ ಅನುಕೂಲತೆ ಮತ್ತು ಆಯ್ಕೆಗಳನ್ನು ಒದಗಿಸುವ ಪ್ರಯತ್ನವನ್ನು ನಾವು ಮಾಡುತ್ತಿದ್ದೇವೆ,’’ ಎಂದರು.

ಟಿಟಿಕೆ ಪ್ರೆಸ್ಟೀಜ್ ಬಗ್ಗೆ
ಟಿಟಿಕೆ ಪ್ರೆಸ್ಟೀಜ್ ಲಿಮಿಟೆಡ್ ಸಂಸ್ಥೆಯು ಟಿಟಿಕೆ ಸಮೂಹದ ಒಂದು ಭಾಗವಾಗಿದೆ. ಕಳೆದ ಆರು ದಶಕಗಳಿಂದ ಟಿಟಿಕೆ ಪ್ರೆಸ್ಟೀಜ್ ಲಿಮಿಟೆಡ್ ಭಾರತದ ಅತಿದೊಡ್ಡ ಕಿಚನ್ ಅಪ್ಲೆಯನ್ಸ್ ಕಂಪನಿಯಾಗಿ ಹೊರ ಹೊಮ್ಮಿದ್ದು, ದೇಶಾದ್ಯಂತ ಗೃಹಣಿಯರ ಅಗತ್ಯಗಳನ್ನು ಪೂರೈಸುತ್ತಿದೆ. ಪ್ರೆಸ್ಟೀಜ್‍ನ ಪ್ರತಿಯೊಂದು ಬ್ರಾಂಡ್ ಅನ್ನು ಸುರಕ್ಷತೆ, ನಾವೀನ್ಯತೆ, ಬಾಳಿಕೆ ಮತ್ತು ನಂಬಿಕೆಯ ಆಧಾರ ಸ್ಥಂಭದಲ್ಲಿ ನಿರ್ಮಿಸಲಾಗಿದೆ. ಆ ಮೂಲಕ ನಮ್ಮ ಬ್ರಾಂಡ್ ಲಕ್ಷಾಂತರ ಮನೆಗಳಲ್ಲಿ ಮೊದಲ ಆಯ್ಕೆಯಾಗಿದೆ.

ಬಡ ಕುಟುಂಬದಿಂದ ಬಂದ ಆ ಸೋದರರು ’ಕ್ವಿಕ್ ಹೀಲ್’ ಕಟ್ಟಿದ ಪರಿಯಿದು

ಲೇಖನ : ಎ.ಸೀತಾರಾಮ ಶಾಸ್ತ್ರಿ

    ಇಂದು ದೇಶದೆಲ್ಲೆಡೆ  “ಮೇಕ್ ಇನ್ ಇಂಡಿಯಾ” ಘೋಷಣೆ ಮೊಳಗುತ್ತಿದೆ. ವಿದೇಶೀ ತಂತ್ರಜ್ಞಾನ ಬಳಸಿಕೊಂಡು ಅರ್ಥಾತ್ ನಕಲು ಮಾಡಿ ತಯಾರಿಸಿದ ಉತ್ಪನ್ನಗಳಿಗೂ ಮೇಕ್ ಇನ್ ಇಂಡಿಯಾ ಹಣೆಪಟ್ಟಿ ಕಟ್ಟಿ ಬೆನ್ನು ತಟ್ಟಿಕೊಳ್ಳುತ್ತಿರುವ ನೂರಾರು ಉದಾಹರಣೆಗಳು ನಮ್ಮ ಕಣ್ಣ ಮುಂದಿವೆ. ಅಂತದ್ದರಲ್ಲಿ ಇಪ್ಪತ್ತು ವರ್ಷಗಳ ಹಿಂದೆಯೇ(1995), ನಮ್ಮ ದೇಶದಲ್ಲಿ ಕಂಪ್ಯೂಟರ್ ಬಳಕೆ ಆಗತಾನೆ ವಿಸ್ತಾರ ಗೊಳ್ಳುತ್ತಿದ್ದಾಗಲೆ, ಇಂಟರ್ ನೆಟ್ ಎಂಬುದು ಇನ್ನೂ ಕಣ್ಣು ಬಿಡುತ್ತಿದ್ದಾಗಲೆ, ತಂತ್ರಾಂಶಗಳಿಗೆ ಬಂದೆರಗುವ ವೈರಸ್ ಎಂಬ ಮಹಮ್ಮಾರಿಯ ಕುರಿತು ಅರಿತು, ಅವುಗಳ ನಿವಾರಣೆಗಾಗಿ ಆಂಟಿವೈರಸ್ ತಂತ್ರಾಂಶವನ್ನು ದೇಶೀಯವಾಗಿ ತಯಾರಿಸಿದ ಕೀರ್ತಿ ಈ ಅಣ್ಣತಮ್ಮಂದಿರಿಗೆ ಸಲ್ಲುತ್ತದೆ. ಅವರೆಂದರೆ ಮಹಾರಾಷ್ಟ್ರ ಮೂಲದ ಕೈಲಾಸ್ ಸಾಹೇಬ್ರಾವ್ ಕಾಟ್ಕರ್ ಮತ್ತು ಸಂಜಯ್ ಸಾಹೇಬ್ರಾವ್ ಕಾಟ್ಕರ್. ಅವರು ಸಿದ್ಧಪಡಿಸಿ ದೇಶಾದಾದ್ಯಂತ ಲಕ್ಷಾಂತರ ಕಂಪ್ಯೂಟರ್, ಸ್ಮಾರ್ಟ್ ಫೋನುಗಳಿಗೆ ವೈರಸ್ ಗಳಿಂದ ರಕ್ಷಣೆ ಕೊಡುತ್ತಿರುವ ಆಂಟಿವೈರಸ್ ತಂತ್ರಾಂಶವೇ ’ಕ್ವಿಕ್ಹೀಲ್’!.

   ಇಂದು ಭಾರತದ ಕಂಪ್ಯೂಟರ್, ಸ್ಮಾರ್ಟ್ಫೋನ್ ಬಳಕೆದಾರರಿಗೆ ಚಿರಪರಿಚಿತ ವಾಗಿರುವ ಮೊಟ್ಟಮೊದಲ ಸ್ವದೇಶೀ ಆಂಟಿವೈರಸ್ ತಂತ್ರಾಂಶ ರೂಪುಗೊಂಡ ಬಗೆ, ಅದರ ಏಳು ಬೇಳುಗಳ ಕಥೆಯನ್ನು ಆ ಸಂಸ್ಥೆಯ ವ್ಯವಸ್ಥಾಪಕ ನಿರ್ದೇಶಕರು ಮತ್ತು ಮುಖ್ಯ ತಾಂತ್ರಿಕ ಅಧಿಕಾರಿಯಾಗಿರುವ ಸಂಜಯ್ ಕಾಟ್ಕರ್ ಅವರ ಮಾತುಗಳಲ್ಲೇ ಕೇಳುವುದೆಂದರೆ ಅದೊಂದು ರೋಚಕವಾದ (ಸಿನಿಮಾ ತೆಗೆಯಲು ಅರ್ಹವಾದ) ಕಥೆಯೇ ಆದೀತು. ಇಂದು ಭಾರತವಷ್ಟೇ ಅಲ್ಲದೆ ಜಪಾನ್, ಅಮೆರಿಕಾ, ದುಬೈ, ಆಫ್ರಿಕಾ ಮೊದಲಾದ ದೇಶಗಳ ಮಾರುಕಟ್ಟೆಗಳಿಗೂ ಲಗ್ಗೆಯಿಟ್ಟು ನೂರಾರು ಕೋಟಿ ರೂಪಾಯಿಗಳ ವ್ಯಾಪಾರ ನಡೆಸುತ್ತಾ ಬಳಕೆದಾದರ ಮನ ಗೆದ್ದಿರುವ ಕ್ವಿಕ್ಹೀಲ್ ಅನ್ನು ಮತ್ತಷ್ಟು ಬೆಳೆಸುವುದಕ್ಕಾಗಿ ಷೇರು ಮಾರುಕಟ್ತೇಯ ಮೂಲಕ ರೂ.250 ಕೋಟಿ ಸಂಗ್ರಹ ಮಾಡಲು ಇದೇ ಫಿಬ್ರವರಿ 8 ರಿಂದ 10 ರ ವರೆಗೆ ಪ್ರಾಥಮಿಕ ಸಾರ್ವಜನಿಕ ಕೊಡುಗೆ (ಐಪಿಓ) ಹೊರಡಿಸಿದೆ. ಈ ಸಂಬಂಧ ಬೆಂಗಳೂರಿನಲ್ಲಿ ಆಯೋಜಿಸಲಾಗಿದ್ದ ಪತ್ರಿಕಾ ಗೋಷ್ಟಿಯಲ್ಲಿ ’ಗಂಧದಗುಡಿ’ಯೊಂದಿಗೆ ಸಂಜಯ್ ಹಂಚಿಕೊಂಡ ತಮ್ಮ ಯಶಸ್ಸಿನ ಕಥೆ ಇದು..

   ಮಹಾರಾಷ್ಟ್ರದ ಬಡ ರೈತರಲ್ಲಿ ಒಬ್ಬರಾದ ಸಾಹೇಬ್ರಾವ್ ಕಾಟ್ಕರ್ ಅವರ ಇಬ್ಬರು ಗಂಡು ಮಕ್ಕಳಲ್ಲಿ ಹಿರಿಯವರಾದ ಕೈಲಾಸ್ ಕುಟುಂಬದ್ ಪೋಷಣೆಗಾಗಿ ತಮ್ಮ ತಂದೆ ಪಡುತ್ತಿರುವ ಕಷ್ಟಗಳನ್ನು ನೋಡಲಾಗದೆ ತಮ್ಮ ವಿದ್ಯಾಭ್ಯಾಸವನ್ನು ಮಧ್ಯದಲ್ಲೇ ನಿಲ್ಲಿಸಿ  ಸ್ಕ್ರೀನ್ ಪ್ರಿಂಟಿಂಗ್ ಕೆಲಸ ಕಲಿತು ಆ ಮೂಲಕ ಸ್ವಯಂ ಉದ್ಯೋಗವನ್ನು ಕಂಡುಕೊಂಡು ದುಡಿಯಲಾರಂಭಿಸಿದರು. ಕೆಲ ದಿನಗಳ ನಂತರ ಜೊತೆಗೆ ರೇಡಿಯೋ ರಿಪೇರಿ ಮಾಡತೊಡಗಿದರು. ಆನಂತರ ಬ್ಯಾಂಕುಗಳಲ್ಲಿ ಬಳಸುತ್ತಿದ್ದ ಕ್ಯಾಲಿಕ್ಯುಲೇಟರ್, ಲೆಡ್ಜರ್ ಪೋಸ್ಟಿಂಗ್ ಮಿಷಿನ್ ರಿಪೇರಿ ಮಾಡಲು ಶುರು ಹಚ್ಚಿಕೊಂಡರು. ಅಷ್ಟರಲ್ಲಾಗಲೇ ಬ್ಯಾಂಕುಗಳಲ್ಲಿ ಕಂಪ್ಯೂಟರುಗಳ ಬಳಕೆ ಆರಂಭವಾಗತೊಡಗಿತ್ತು. ಕಂಪ್ಯೂಟರ್ ರಿಪೇರಿ ಕಲಿತರೆ ಮುಂದಿನ ದಿನಗಳಲ್ಲಿ ಒಳ್ಳೆಯ ಭವಿಷ್ಯವಿದೆ ಎಂಬುದನ್ನು ಮನಗಂಡ ಕೈಲಾಸ್ ಆ ಕೆಲಸಕ್ಕೂ ಕೈ ಹಾಕಿದರು. ಆ ಸಮಯಕ್ಕೆ ಅವರ ತಮ್ಮನಾದ ಸಂಜಯ್ ಇಂಜಿನೀರಿಂಗ್ ಕೋರ್ಸಿಗೆ ಪ್ರವೇಶ ಪಡೆದಿದ್ದರು. ಅವರದ್ದು ಕಂಪ್ಯೂಟರ್ ಸೈನ್ಸ್ ವಿಭಾಗವಾಗಿದ್ದರೂ ಕಾಲೇಜಿನಲ್ಲಿ ಸಾಕಷ್ಟು ಕಂಪ್ಯೂಟರುಗಳು ಲಭ್ಯವಿಲ್ಲದ ಕಾರಣ ಅವುಗಳ ಬಳಕೆಗೆ ಅವಕಾಶ ಅಷ್ಟಾಗಿ ಸಿಗುತ್ತಿರಲಿಲ್ಲ. ಹಾಗಾಗಿ ಬಿಡುವಿನ ವೇಳೆಯಲ್ಲಿ ಅಣ್ಣನ ಜೊತೆಗಿದ್ದು ರಿಪೇರಿಗಾಗಿ ಬರುತ್ತಿದ್ದ ಕಂಪ್ಯೂಟರುಗಳಲ್ಲಿ ಕೆಲಸ ಕಲಿಯ ತೊಡಗಿದರು. ಆ ಸಮಯದಲ್ಲಿ ಅವರಿಗೆ ತಂತ್ರಾಂಶಗಳಿಗೆ ಬಂದೆರಗಿ ಅವುಗಳನ್ನು ನಾಶಮಾಡುವ ವೈರಸ್ ಗಳ ಕುರಿತಂತೆ ಅರಿವಾಯಿತು. ಇಂಜಿನೀರಿಂಗ್ ಮುಗಿದು ಸ್ನಾತಕೋತ್ತರ ಪದವಿಗೆ ಸೇರಿದ ಸಂಜಯ್ ಓದಿನ ಜೊತೆಗೆ ವೈರಸ್ ನಿವಾರಣೆ ಕುರಿತು ಪ್ರಯೋಗಗಳನ್ನು ಮಾಡತೊಡಗಿದರು. ಅವರ ಸಾಧನೆಯ ಫಲವಾಗಿ ಪ್ರಪ್ರಥಮ ಸ್ವದೇಶೀ ಆಂಟಿವೈರಸ್ ತಂತ್ರಾಂಶ ಕ್ವಿಕ್ ಹೀಲ್ ರೂಪುಗೊಂಡಿತು.

   ಸಂಜಯ್ ತಮ್ಮ ಸ್ನಾತಕೋತ್ತರ ಪದವಿ ಮುಗಿಸಿ ಕಾಲೇಜಿನಿಂದ ಹೊರಬೀಳುವ ಮೊದಲೇ 1995 ರಲ್ಲಿ  ಕ್ವಿಕ್ಹೀಲ್ ಮೊದಲ ಆವ್ರತ್ತಿಯನ್ನು ಬಿಡುಗಡೆ ಮಾಡಿದರು. ಅದರ ಮಾರ್ಕೆಟ್ ಮಾಡುವ ಜವಾಬ್ದಾರಿಯನ್ನು ಅಣ್ಣ ಕೈಲಾಸ್ ವಹಿಸಿಕೊಂಡರು. ಮೊದಲು ಪುಣೆ ನಗರದಲ್ಲಿ ಕಂಪ್ಯೂಟರ್ ಮಳಿಗೆಗಳಲ್ಲಿ ಕ್ವಿಕ್ಹೀಲ್ ಮಾರಾಟ ಮಾಡತೊಡಗಿದರು. ಆದರೆ ಅಂದಿನ ದಿನಗಳಲ್ಲಿ ವೈರಸ್ ಕಾಟ ಅಷ್ಟಾಗಿ ಇಲ್ಲದಿರುವುದು ಮತ್ತು ದುಡ್ಡುಕೊಟ್ಟು ತಂತ್ರಾಂಶಗಳನ್ನು ಕೊಳ್ಳಲು ಕಂಪ್ಯೂಟರ್ ಬಳ್ಕೆದಾರರು ಆಸಕ್ತಿ ತೋರದ ಕಾರಣ ಅಣ್ಣ ತಮ್ಮಂದಿರ ಶ್ರಮಕ್ಕೆ ತಕ್ಕ ಪ್ರತಿಫಲ ದೊರೆಯುತ್ತಿರುವುದಿಲ್ಲ. ಆದರೂ ಛಲ ಬಿಡದೆ ಸಂಶೋಧನೆ ಮತ್ತು ಮಾರುಕಟ್ಟೆ ವಿಸ್ತರಣೆಯನ್ನು ಮುಂದುವರೆಸಿದ ಫಲವಾಗಿ ಅವರ ವ್ಯವಹಾರ ದಿನೇದಿನೇ ಅಭಿವ್ರದ್ಧಿ ಆಗುತ್ತಾ ಬಂದಿತು. ಹಾಗಾಗಿ 1998 ರಿಂದ ಕಂಪ್ಯೂಟರ್ ರಿಪೇರಿಯನ್ನು ಪಕ್ಕಕ್ಕಿಟ್ಟು ಪೂರ್ತಿಯಾಗಿ ಕ್ವಿಕ್ಹೀಲ್ ವ್ಯಾಪಾರದತ್ತ ಗಮನ ಹರಿಸಿದರು. 2002 ರಲ್ಲಿ ಅನುಭವಿಗಳಾದ ಮಾರ್ಕೆಟಿಂಗ್ ತಂಡವನ್ನು ನೇಮಿಸಿಕೊಂಡು ದೇಶದಾದ್ಯಂತ ವ್ಯಾಪಾರವನ್ನು ವಿಸ್ತರಿಸಿದರು. 2011 ರಲ್ಲಿ ಎಂಟರ್ಪ್ರೈಸ್ ಸೆಕ್ಯುರಿಟಿ ತಂತ್ರಾಂಶವನ್ನು ಅಭಿವ್ರದ್ದಿ ಪಡಿಸಿದರು. ಅಷ್ಟರಲ್ಲಿ ಇಂಟರ್ನೆಟ್ ಬಳಸ ಬಹುದಾದ ಸ್ಮಾರ್ಟ್ಫೋನಗಳು ಮಾರುಕಟ್ಟೆಯಲ್ಲಿ ವಿಜ್ರಂಭಿಸಲಾರಂಭಿಸಿದ್ದವು. ಅವುಗಳಿಗೆ ಸೂಕ್ತವಾದ ಆಂಟಿವೈರಸ್ ತಂತ್ರಾಂಶವನ್ನು 2015 ರಲ್ಲಿ ಕ್ವಿಕ್ಹೀಲ್ ನಿಂದ ಹೊರತರಲಾಯಿತು. ಹೀಗೆ ಒಂದೊಂದೇ ಮಜಲುಗಳನ್ನು ದಾಟುತ್ತಾ ಇಂದು ದೇಶದ ನಂಬರ್ ವನ್ ಆಂಟಿವೈರಸ್ ತಂತ್ರಾಂಶ ಎಂಬ ಖ್ಯಾತಿಗೆ ಕ್ವಿಕ್ಹೀಲ್ ಪಾತ್ರವಾಗಿದೆ. ಅಷ್ಟೇ ಅಲ್ಲದೆ ವಿದೇಶಗಳಿಗೂ ತನ್ನ ಮಾರುಕಟ್ಟೆಯನ್ನು ವಿಸ್ತರಿಸಿದೆ. ಇಂದು ಪ್ರತಿದಿನ ಸುಮಾರು 2.50 ಲಕ್ಷ ವೈರಸ್ ಗಳು ಉತ್ಪತ್ತಿಯಾಗುತ್ತಿದ್ದು, ಕಂಪ್ಯೂಟರ್ ಬಳಕೆದಾರರು ಅದರಲ್ಲೂ ಇಂಟರ್ನೆಟ್ ಬಳಸುವವರು ಆಂಟಿವೈರಸ್ ಬಳಸಲೇಬೇಕಾದ ಅನಿವಾರ್ಯತೆ ಏರ್ಪಟ್ಟಿದೆ. ಮುಂದಿನ ದಿನಗಳಲಿ ತಮ್ಮ ಎಂಟರ್ಪ್ರೈಸ್ ಸೆಕ್ಯುರಿಟಿ ತಂತ್ರಾಂಶವನ್ನು ಇನ್ನಷ್ಟು ಅಭಿವ್ರದ್ಧಿಗೊಳಿಸಿ ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕ್ವಿಕ್ಹೀಲ್ ಸ್ಥಾನವನ್ನು ಭದ್ರಗೊಳಿಸುವುದು ತಮ್ಮ ಮುಂದಿರಿವ ಗುರಿ ಎಂದು ಸಂಜಯ್ ತಮ್ಮ ಗುರಿಯನ್ನು ಸ್ಪಷ್ಟ ಪಡಿಸಿದರು. ಕಾಟ್ಕರ್ ಸಹೋದರರ ಈ ಸಾಹಸೋಪೇತ ಪ್ರಯತ್ನಕ್ಕೆ ಯಶಸ್ಸು ಕೋರುವುದು”ಮೇಕ್ ಇನ್ ಇಂಡಿಯಾ’ ಬೆಂಬಲಿಸಿದಂತೆ ಅಲ್ಲವೇ.!!